Дукресса көз тамшылары 5 мг/мл + 1 мг/мл 5 мл Алматыда

Дәрілік препаратты медициналық қолдану

жөніндегі нұсқаулық (Қосымша парақ)

Саудалық атауы

Дукресса® 5,0 мг/мл + 1,0 мг / мл, көзге тамызатын дәрі

Халықаралық патенттелмеген атауы

----

Дәрілік түрі, дозасы

Көзге тамызатын дәрі

Фармакотерапиялық тобы

Сезім мүшелері. Офтальмологиялық препараттар. Біріктірілген қабынуға қарсы және инфекцияға қарсы препараттар. Инфекцияға қарсы препараттармен біріктірілген дексаметазон.

АТХ коды S01CA01

Қолданылуы

Дукресса® көзге тамызатын дәрісі қабынудың алдын алу және емдеу үшін, сондай-ақ ересектерде катарактаны жою операциясымен байланысты инфекцияның алдын алу үшін көрсетілген.

Қолдану басталғанға дейін танысу қажет мәліметтер тізбесі

Қолдануға болмайтын жағдайлар

левофлоксацинге немесе басқа хинолондарға, дексаметазонға немесе басқа стероидтарға немесе қосымша заттардың кез келгеніне аса жоғары сезімталдық;

қарапайым герпес, кератит, желшешек және нұрлы қабық пен көздің шырышты қабығының басқа вирустық аурулары;

туберкулез микобактериясы, лепра микобактериясы немесе Mycobacterium avium кешені сияқты қышқылға төзімді микобактериялардан туындаған көздің микобактериялық инфекциялары;

көздің зең аурулары;

көздің емделмеген іріңді инфекциясы.

Қолдану кезіндегі қажетті сақтық шаралары

Дукресса® препараты тек офтальмологиялық қолдануға арналған және субконъюнктивальді енгізуге арналмаған. Ерітіндіні тікелей көздің алдыңғы камерасына енгізуге болмайды.

Басқа бактерияға қарсы дәрілерді қолданған жағдайдағы сияқты препаратты ұзақ уақыт қолдану төзімді микроорганизмдердің, соның ішінде зеңнің шамадан тыс өсуі нәтижесінде антибиотикке төзімділіктің дамуына әкелуі мүмкін. Клиникалық көрініс нашарлаған немесе жақсару болмаған жағдайда препаратты тоқтатып, басқа дәрілік заттармен емдеуді тағайындау керек. Клиникалық көрсетілімдер болған кезде пациентті саңылаулы шамы бар биомикроскопия сияқты қосымша құралдардың көмегімен, ал қажет болған жағдайда флуоресцеинмен бояу арқылы тексеру керек.

Жергілікті офтальмологиялық стероидтарды ұзақ уақыт қолдану көзішілік қысымның/глаукоманың жоғарылауына әкелуі мүмкін, бірақ Дукресса® препаратын ұсынылған емдеу курсы (7 күн) ішінде қолданғанда ондай ықтималдығы аз. Қалай болғанда да, көзішілік қысымды мезгіл-мезгіл өлшеп отыру керек. Кортикостероидтардан туындаған көзішілік қысымның жоғарылау қаупі тиісті бейімділігі бар пациенттерде (мысалы, диабетпен ауыратын пациенттерде) артады.

Жүйелі және жергілікті кортикостероидтарды қолданғанда көрудің бұзылуы туындауы мүмкін. Егер пациентте бұлыңғыр көру немесе көрудің бұзылуы сияқты симптомдар пайда болса, оны катарактаны алып тастау бойынша хирургиялық операциядан кейінгі асқынулармен, глаукоманың дамуымен немесе жүйелі және жергілікті кортикостероидтарды қолдану кезінде хабарланған орталық серозды хориоретинопатия (ЦСД) сияқты сирек аурулармен байланысты болуы мүмкін себептерді анықтау үшін офтальмологқа жіберу қажет.

Жергілікті қолдануға арналған офтальмологиялық кортикостероидтар мөлдір қабақтың сауығу процесін баяулатуы мүмкін. Жергілікті офтальмологиялық ҚҚСП да мөлдір қабақтың сауығуын баяулатады. Жергілікті офтальмологиялық ҚҚСД және стероидтарды бір мезгілде қолдану жараларды емдеумен байланысты проблемалардың туындау ықтималдығын арттыруы мүмкін.

Жергілікті кортикостероидтарды мөлдір қабықтың немесе склераның жұқаруына әкелетін ауруларға қолдану тесілуге әкелуі мүмкін екендігі белгілі.

Жүйелік әсері

Фторхинолондар аллергиялық реакцияларды тіпті бір рет қолданғанда да тудыруы мүмкін. Левофлоксацинге аллергиялық реакция пайда болған кезде емдеуді тоқтату керек.

Жүйелі емге арналған фторхинолондар, оның ішінде левофлоксацин, әсіресе кортикостероидтарды бір мезгілде қолданатын егде жастағы пациенттерде сіңірдің қабынуын немесе үзілуін тудыруы мүмкін. Сондықтан сіңір қабынуының алғашқы белгілерінде де сақ болу және Дукресса® қолдануды тоқтату керек.

Иммундық жүйеге әсері

Ұзақ уақыт қолдану (әдетте емдеу басталғаннан кейін 2 апта ішінде) иммундық жауаптың бәсеңдеуіне немесе сауығу процесінің баяулауына байланысты көздің қайталама инфекцияларының (бактериялық, вирустық немесе зеңдік) дамуына әкелуі мүмкін. Сонымен қатар, өзекті қолдануға арналған көз кортикостероидтары шартты патогендік микроорганизмдерден туындаған көз инфекцияларының көріністері мен симптомдарын тудыруы, нашарлатуы немесе бүркемелеуі мүмкін. Дукресса® құрамындағы кортикостероидтарды қысқа мерзімде қолданғанда мұндай жағдайлардың пайда болу ықтималдығы аз.

Қосымша заттар

Құрамында фосфаттары бар Дукресса® сияқты офтальмологиялық дәрілік препараттарды қолданған кезде көруді қалпына келтіру мақсатында мөлдір қабықты транспланттау бойынша операцияларды талап ететін мөлдір қабықты кальцийлеу жағдайлары туралы хабарланды. Мөлдір қабық кальцификациясының алғашқы белгілері пайда болған кезде емдеуді тоқтатып, пациентті құрамында фосфаты жоқ дәрілік препаратқа ауыстыру керек.

Осы өнімде консервант ретінде қолданылатын бензалконий хлориді нүктелік кератопатияны және/немесе уытты ойық жаралы кератопатияны тудырады деп хабарланды. Бензалконий хлориді көзді тітіркендіреді және жұмсақ жанаспалы линзалардың түсін кетіреді. Препараттың жұмсақ жанаспалы линзалармен жанасуын болдырмаңыз. Пациенттерге Дукресса® препаратын қолданар алдында жанаспалы линзаларды алып, оларды 15 минуттан соң қайта тағу қажет екені айтылуы қажет.

Катарактаны алып тастау бойынша хирургиялық операциядан кейін Дукресса® препаратымен емдеудің барлық кезеңі ішінде жанаспалы линзаларды тағуға болмайды.

Басқа дәрілік препараттармен өзара әрекеттесуі

Басқа дәрілік препараттармен өзара әрекеттесуіне зерттеулер жүргізілген жоқ.

Көзге тамызатын басқа ерітінділерді бір мезгілде қолданған кезде инстилляциялар арасындағы аралық 15 минут болуы тиіс.

Жергілікті қолданғаннан кейін плазмадағы левофлоксациннің ең жоғары концентрациясы пероральді қабылдағанға қарағанда 1000 есе аз болғандықтан, басқа дәрілік заттармен өзара әрекеттесудің әсері клиникалық тұрғыдан маңызды болу ықтималдығы аз.

Пробенецидті, циметидинді немесе циклоспоринді бір мезгілде қолдану левофлоксацин фармакокинетикасына, бірақ аз ғана дәрежеде әсер етеді.

Топикалық стероидтарды және жергілікті ҚҚСД (қабынуға қарсы стероидты емес препараттар) бір мезгілде қолдану жаралардың жазылуымен проблемалар тудыруы мүмкін.

CYP3A4 тежегіштері (ритонавир мен кобицистатты қоса) дексаметазон клиренсін азайтуы мүмкін, бұл әсердің күшеюіне әкеледі. Мұндай біріктірілімді пайдаланудан аулақ болу керек, бірақ егер күтілетін пайда жүйелік кортикостероидтарды қолданудың жағымсыз әсерлерінің даму қаупінен асып кетсе, онда жүйелік кортикостероидтар әсерінің пайда болуын қадағалау қажет.

Препараттың көлік құралын немесе қауіптілігі зор механизмдерді басқару қабілетіне әсер ету ерекшеліктері

Дукресса® препаратының көлік құралдарын және/немесе механизмдерді басқару қабілетіне әсер етуіне зерттеулер жүргізілмеген.

Басқа көзге тамызатын дәрілерді қолданғандағыдай, көлік құралдарын басқару және механизмдермен жұмыс істеу қабілетіне әсер етуі мүмкін уақытша бұлыңғыр көру немесе басқа көру бұзылыстары болуы мүмкін. Егер бұлыңғыр көру пайда болса, көру айқын болғанша күтіп, содан кейін ғана көлік жүргізу немесе механизмдермен жұмыс істеу қажет.

Арнайы сақтандырулар

Фертильділігі

Дукресса® препаратының репродуктивті функцияға ықтимал әсері туралы деректер жоқ.

Жүктілік және лактация кезінде

Жүктілік

Жүкті әйелдерде Дукресса® көзге тамызатын дәріні пайдалану туралы деректер ықтимал жағымсыз әсерлерді бағалау үшін жеткіліксіз. Кортикостероидтар плацента арқылы өтеді. Тератогендік әсерлер жануарларда байқалды.

Алайда, бүгінгі күні Дукресса® препараты адамдарда тератогендік әсер тудыратыны туралы деректер жоқ. Дәрілік препаратты жоғары дозаларда жүйелі қолданған кезде шаранаға/жаңа туған нәрестеге әсер ету туралы хабарланды (құрсақішілік дамудың кідіруі, бүйрек үсті безі қыртысы функциясының бәсеңдеуі). Алайда, көзге тамызатын дәріні қолданған кезде мұндай әсерлер туралы хабарланған жоқ.

Буаз жануарларда кортикостероидтарды жергілікті және жүйелі қолдану ұрық дамуының бұзылуына, соның ішінде қатты таңдайдың жарылуына әкелуі мүмкін. Сонымен қатар, жануарларға жүргізілген клиникалық зерттеулерге сәйкес жүйелі глюкокортикостероидтарды жүктілік кезінде фармакологиялық дозаларда қолдану құрсақішілік дамудың, жүрек-қантамырлары ауруларының және/немесе ересектердегі зат алмасуы бұзылуының және/немесе нейропсихикалық дамудың бұзылу қаупін арттыруы мүмкін. Жүктілік кезіндегі емдеу, әсіресе бірінші триместрде, пайда-қауіп арақатынасын мұқият бағалағаннан кейін ғана тағайындалуы мүмкін. Адамның қатысуымен жүргізілген зерттеулер эмбриоуыттылық әсер етуіне ешқандай күмән туғызбаған. Алайда, ұзақ мерзімді емдеу кезінде туылатын балада өсудің бұзылу қаупін жоққа шығаруға болмайды. Жүктіліктің соңғы кезеңдерінде емдеу босанғаннан кейін емдеуді қажет ететін глюкокортикостероидтардың организмге шығарылуын тежеуі мүмкін.

Сақтық шарасы ретінде жүктілік кезінде Дукресса® препаратын қолданудан аулақ болған жөн.

Бала емізу

Левофлоксацин мен дексаметазон емшек сүтіне енеді. Егер күтілетін пайда ықтимал қауіптен аспаса, емшекпен емізу кезеңінде Дукресса® препаратын қолдануға болмайды. Дукресса® препаратын қолданудың барлық курсы ішінде емшек емізуді тоқтату керек.

Қолдану бойынша ұсынымдар

Дозалау режимі

Офтальмологиялық операциядан кейін конъюнктивалық қалтаға әр 6 сағат сайын бір тамшыдан. Емдеу ұзақтығы - 7 күн. Емдеу курсын үзуге болмайды.

Бір дозаны өткізіп алған кезде емдеу әдеттегі сызба бойынша жалғастырылады.

Қолдану тәсілі

Жергілікті қолдануға арналған.

Дәрілік препараттың көз жасы жолдарына түсуін болдырмау үшін көздің ішкі бұрышын басып тұрып, көздің сыртқы бұрышына бір тамшыдан тамызады.

Пациенттер қолданар алдында қолдарын жуып, құтының ұштығын көзге немесе оның айналасындағы тіндерге тигізіп алмағандары жөн, өйткені бұл көздің жарақатына әкелуі мүмкін.

Сондай-ақ, пациенттерге офтальмологиялық ерітінділер дұрыс қолданылмаса, көз инфекциясын тудыруы қабілетті қарапайым бактериялармен ластануы мүмкін екендігі жайында айтылуы керек. Ластанған ерітінділерді қолдану көздің ауыр зақымдалуына және кейіннен көру қабілетінің жоғалуына әкелуі мүмкін.

Мұрын-лакримальді окклюзия көз жасы арналары арқылы жүйелік сіңірілуін төмендетуі мүмкін.

Көзге тамызатын басқа дәрілерді бір мезгілде қолданған кезде инстилляциялар арасындағы аралық кемінде 15 минуттан кем болмауы тиіс.

Пациенттерге Дукресса® қолданар алдында жанаспалы линзаларды алып тастау және оларды 15 минут өткеннен соң ғана қайта тағу қажет екендігі туралы айтылуы тиіс.

Пациенттердің ерекше топтары

Балаларда қолдану

18 жасқа дейінгі балалар мен жасөспірімдерде Дукресса® препаратының қауіпсіздігі мен тиімділігі анықталмаған. Қолжетімді деректер жоқ .

Дукресса® көзге тамызатын дәрісін 18 жасқа дейінгі балалар мен жасөспірімдерде қолдану ұсынылмайды.

Егде жастағы пациенттерде қолдану

Ұсынылған дозаны түзету қажет емес.

Бүйрек, бауыр функциясының бұзылуында қолдану

Бүйрек / бауыр жеткіліксіздігі бар пациенттерде зерттеулер жүргізілмеген, сондықтан Дукресса® препаратын мұндай пациенттерде сақтықпен қолдану керек.

Артық дозалану жағдайында қабылдануы қажет шаралар

Дукресса® препаратындағы левофлоксацин мен дексаметазонның жалпы құрамы кездейсоқ жұтылған жағдайда уытты әсер етуге тым аз болады.

Артық дозаланған жағдайда емдеуді тоқтату қажет. Көзді ұзақ уақыт тітіркендірген жағдайда стерильді сумен шаю қажет.

Дәрілік препаратты қолдану тәсілін түсіндіру үшін медицина қызметкердің кеңесіне жүгіну бойынша ұсынымдар

Дәрілік препаратты қабылдамас бұрын дәрігермен немесе фармацевтпен кеңесіңіз.

Дәрілік препаратты стандартты қолдану кезінде пайда болатын жағымсыз реакциялардың сипаттамасы және бұл жағдайда қабылдануы керек шаралар

Төменде келтірілген жағымсыз реакциялар ағзалардың, ағзалар жүйелерінің зақымдануына және пайда болу жиілігіне сәйкес келтірілген. Кездесу жиілігі мынадай түрде анықталады: өте жиі (≥ 1/10), жиі (≥ 1/100 және < 1/10), жиі емес (≥ 1/1 000 және < 1/100), сирек (≥ 1/10 000 және < 1/1 000), өте сирек (< 1/10 000, жекелеген жағдайларды қоса). Кездесу жиілігінің санаттары препараттың клиникалық зерттеулері және тіркеуден кейінгі бақылау негізінде анықталды.

Жағымсыз реакциялардың кездесу жиілігі

Жүйке жүйесі тарапынан бұзылулар

Жиі емес:бас ауыруы, дисгевзия

Көру ағзасы тарапынан бұзылулар

Жиі емес:көздің тітіркенуі, көздегі атиптік сезінулер, көзішілік қысымның жоғарылауы

Асқазан-ішек жолы тарапынан бұзылулар

Жиі емес:жүрек айнуы, тіл тарапынан бұзылулар

Тері және тері асты тіндері тарапынан бұзылулар

Жиі емес:қышыну

Зертханалық және аспаптық деректер

Жиі емес:көзішілік қысымның жоғарылауы (*)

( * ) > 6 мм с.б, көзішілік қысымның елеулі жоғарылауын білдіреді

Осы дәрілік препараттың әсер етуші заттарын бөлек қолданған кезде байқалған, демек Дукресса® препаратын қолданғанда да туындауы мүмкін жағымсыз реакциялар төменде келтірілген:

Левофлоксацин:

Иммундық жүйенің бұзылуы

Сирек:Экстраокулярлық аллергиялық реакциялар, оның ішінде тері бөртпесі

Өте сирек:Анафилаксия

Жүйке жүйесі тарапынан бұзылулар

Жиі емес:Бас ауыруы

Көру ағзасы тарапынан бұзылулар

Жиі:Көзді күйдіру сезімі, көру қабілетінің нашарлауы және көзден шырышты бөліністер

Жиі емес:Қабақтың күңгірттенуі, хемоз, папилярлы конъюнктивалық реакция, қабақтың ісінуі, көздегі жайсыздық, көздің қышуы, көздің ауыруы, конъюнктивалық инъекция, конъюнктивалық фолликулалар, көздің құрғауы, қабақтың қызаруы және көздің қарығуы.

Тыныс алу жүйесі, кеуде қуысы және көкірек ортасы ағзалары тарапынан бұзылулар

Жиі емес:Ринит

Өте сирек:Көмейдің ісінуі

Сонымен қатар, левофлоксацинді жүйелі пайдаланумен байланысты жағымсыз реакциялар Дукресса® қабылдаған кезде де туындауы мүмкін:

Жүйелі фторхинолондарды қабылдаған пациенттерде хирургиялық араласуды талап еткен немесе еңбекке қабілеттілігін ұзақ уақытқа жоғалтуға әкеп соққан иық, қол, ахилла немесе басқа сіңірлердің үзілуі туралы хабарланды. Маркетингтен кейінгі зерттеулер және жүйелік хинолондарды қолдану тәжірибесі кортикостероидтарды қабылдайтын пациенттерде сіңірлердің үзілу қаупі, әсіресе ахилла сіңірін қоса, сіңірлері ауыр жүктемеде болатын пациенттерде артуы мүмкін екенін көрсетіп отыр.

Дексаметазон:

Көру ағзасы тарапынан бұзылулар

Өте жиі:Көзішілік қысымның жоғарылауы*

Жиі:Жайсыздық*, тітіркену*, ашыту*, жедел ауырсыну*, қышыну * және бұлыңғыр көру*

Жиі емес:Аллергиялық реакциялар, жаралар жазылуының кешеуілдеуі, артқы-капсулярлы катаракта*, оппортунистік инфекция, глаукома*

Өте сирек:Конъюнктивит, қарашықтың кеңеюі, жоғарғы қабақтың түсуі, кортикостероидтарды қолданудан туындаған увеит, мөлдір қабықтың кальцификациясы кристалдық кератопатия, мөлдір қабық қалыңдығының өзгеруі*, мөлдір қабықтың ісінуі, мөлдір қабықтың ойық жаралануы және мөлдір қабықтың перфорациясы

Эндокриндік жүйе тарапынан бұзылулар

Жиі емес:Бүйрек үсті безі функциясының бәсеңдеуі*

Жиілігі белгісіз:Кушинг синдромы, адренальді супрессия

Жалпы сипаттағы асқынулар және жергілікті реакциялар

Жиі емес:Беттің ісінуі

* Көзішілік қысымның (КІҚ) жоғарылауы және глаукоманың дамуы мүмкін. Кортикостероидтарды ұзақ уақыт қолдану көзішілік қысымның/глаукоманың жоғарылауына әкелуі ықтимал (әсіресе, стероидтарды қолдану кезінде КІҚ жоғарылаған немесе бұрын КІҚ жоғарылауы немесе глаукома тіркелген пациенттерде). Балалар мен егде жастағы пациенттер стероидтарды қолданудан туындаған КІҚ жоғарылауын ерекше сезінуі мүмкін. Қант диабетімен ауыратын пациенттер жергілікті стероидтарды ұзақ уақыт қолданудың салдарынан субкапсулярлық катаракта дамуына бейім болады.

Кортикостероидтардан туындаған көзішілік қысымның жоғарылауы емдеу басталғаннан кейін 2 апта ішінде байқалды.

Инстилляциядан кейін бірден жайсыздық, тітіркену, ашыту, жедел ауырсыну, қышыну және көрудің бұлдырауын сезіну пайда болуы мүмкін. Мұндай сезімдер, әдетте, жеңіл көтерімді, тез өтеді және ешқандай әсер етпейді.

Кейбір жағдайларда мөлдір қабықтың жұқаруына әкелетін ауруларда жергілікті стероидтарды қолдану перфорацияға әкелуі мүмкін.

Дәрілік препаратты жиі қолданғанда Дукресса® препаратының жүйелі сіңуіне байланысты бүйрек үсті безі функцияларының бәсеңдеуі орын алады.

Құрамында фтор бар көзге тамызатын дәріні пайдаланумен байланысты мөлдір қабықтың кальцификация жағдайлары туралы оқта-текте хабарланған, бірақ ол тек мөлдір қабықтың едәуір зақымдануы бар кейбір пациенттерге қатысты.

Жағымсыз дәрілік реакциялар туындағанда медициналық қызметкерге, фармацевтке немесе дәрілік препараттардың тиімсіздігі туралы хабарламаларды қоса, дәрілік препараттарға болатын жағымсыз реакциялар (әсерлер) бойынша ақпараттық деректер базасына тікелей хабарласу керек

«Cантен» АҚ Қазақстандағы өкілдігі

Панфилов к-сі 98, 713 кеңсе, 050000 Алматы, Қазақстан

Телефон нөмірі – 250-39-17

Электронды пошта: santen.kaz@santen.com

Қазақстан Республикасы Денсаулық сақтау министрлігі Медициналық және фармацевтикалық бақылау комитетінің «Дәрілік заттар мен медициналық бұйымдарды сараптау ұлттық орталығы» ШЖҚ РМК

http://www.ndda.kz

Қосымша мәліметтер

Дәрілік препараттың құрамы

1 мл препараттың құрамында:

белсенді заттар: 5,12 мг левофлоксацин гемигидраты 5,0 мг левофлоксацинге баламалы және 1,32 мг дексаметазон натрий фосфаты 1 мг дексаметазонға баламалы.

қосымша заттар: 0,10 мг бензалконий хлориді, натрий дигидрофосфаты моногидраты, натрий гидрофосфаты додекагидраты, натрий цитраты, натрий гидроксиді 1 М немесе хлорсутек қышқылы рН жеткізу үшін, инъекцияға арналған су 1 мл дейін.

Сыртқы түрінің, иісінің, дәмінің сипаттамасы

Жасыл-сары түсті мөлдір ерітінді, іс жүзінде көрінетін бөлшектер жоқ.

Шығарылу түрі және қаптамасы

5 мл препараттан тығыздығы төмен полиэтиленнен (ТТПЭ) жасалған стерильді құтыларға құйылады, олар ТТПЭ жасалған ақ түсті тамшылатқыш құрылғысы мен тығыздығы жоғары полиэтиленнен (ТЖПЭ) жасалған ақ түсті бұрандалы қақпақпен жабдықталған.

1 құтыдан медициналық қолдану жөніндегі қазақ және орыс тілдеріндегі нұсқаулықпен бірге картон қорапқа салынған.

Сақтау мерзімі

3 жыл.

Құтыны ашқаннан кейін 28 күн ішінде пайдалану керек.

Қаптамада көрсетілген жарамдылық мерзімі өткеннен кейін қолдануға болмайды.

Сақтау шарттары

25 °С-ден аспайтын температурада сақтау керек.

Балалардың қолы жетпейтін жерде сақтау керек.

Дәріханалардан босатылу шарттары

Рецепт арқылы

Өндіруші туралы мәліметтер

Тубилюкс Фарма С.п.А.

Виа Костарика, 20/22, 00071 Помеция (RM), Италия

Тел.: +39-06-911831

Эл. пошта: tubilux@tubilux.it

Тіркеу куәлігінің ұстаушысы

Сантен АҚ

Нииттюханкату 20, 33720 Тампере, Финляндия

Тел.: +358-3-2848111

Эл. пошта: regulatoryaffairs@santen.com

Қазақстан Республикасының аумағында тұтынушылардан дәрілік заттардың сапасы жөніндегі шағымдарды (ұсыныстарды) қабылдайтын және дәрілік заттың тіркеуден кейінгі қауіпсіздігін қадағалауға жауапты ұйымның атауы, мекенжайы және байланыс деректері (телефон, факс, электронды пошта)

«Cантен» АҚ Қазақстандағы өкілдігі

Панфилов к-сі 98, 713 кеңсе, 050000 Алматы, Қазақстан

Телефон нөмірі – 250-39-17

Электронды пошта: santen.kaz@santen.com