Рикофаст Антигриппин таблеткалар № 10 - бағасы Астанада

Дәрілік препаратты медициналық қолдану

жөніндегі нұсқаулық (Қосымша парақ)

Саудалық атауы

РИКОФАСТ АНТИГРИППИН

Халықаралық патенттелмеген атауы

Жоқ

Дәрілік түрі, дозасы

Таблеткалар

Фармакотерапиялық тобы

Жүйке жүйесі. Анальгетиктер. Басқа анальгетиктер және антипиретиктер. Анилидтер. Парацетамол, біріктірілімдері, психолептиктерді қоспағанда.

АТХ коды N02BE51

Қолданылуы

- жоғары температура, тұмаурату, мұрынның бітелуі, бас ауыруы және дененің ауыруы сияқты суық тию мен тұмау симптомдарын жеңілдету

Қолдануды бастағанға дейін қажетті мәліметтер тізбесі

Қолдануға болмайтын жағдайлар

- әсер етуші заттарға немесе қосымша заттардың кез келгеніне аса жоғары сезімталдық

- компенсацияланбаған жүрек жеткіліксіздігін, өткізгіштіктің бұзылуын, аритмияны, айқын атеросклерозды, тамырлардың түйілуіне бейімділікті, жүректің ишемиялық ауруының ауыр түрін қоса, ауыр жүрек-қантамыр аурулары; ауыр артериялық гипертензия

- бауыр мен бүйрек функциясының айқын бұзылулары

- несеп шығарудың қиындауымен қуық асты безінің аденомасы, қуық мойнының обструкциясы

- асқазан мен он екі елі ішектің стеноздаушы ойық жарасы, пилородуоденальді обструкция, жедел панкреатит

- эпилепсия

- қан аурулары (оның ішінде айқын анемия, лейкопения)

- гипертиреоз

- қант диабеті

- бронх демікпесі

- глаукома

- глюкоза-6-фосфат дегидрогеназа тапшылығы

- алкоголизм

- жоғары қозғыштық, ұйқының бұзылуы

- туа біткен гипербилирубинемия

- трициклді антидепрессанттармен, ß-блокаторлармен бір мезгілде қолдану; МАО тежегіштерімен бір мезгілде және оларды қолдану тоқтатылғаннан кейін 2 апта ішінде қабылдау

- тыныс алу жеткіліксіздігінің туындау қаупі бар пациенттерге қолдануға болмайды

- жүктілік және лактация кезеңі

- 12 жасқа дейінгі балалар

Қолдану кезінде қажетті сақтық шаралары

Ұсынылған дозадан асырмаңыз.

Құрамында парацетамол бар препараттармен және басқа да тұмауға қарсы дәрілермен; седативті, ұйықтататын дәрілермен бір мезгілде қолдануға болмайды. Егер ауру симптомдары жойылмаса немесе бас ауыруы тұрақты болып қалса, пациент дәрігермен кеңесу керек.

Шылым шегу немесе жөтел шамадан тыс қақырық секрециясымен бірге жүретін кездегі өкпе эмфиземасы нәтижесінде пайда болатын тыныс алу жолдарының созылмалы обструктивті аурулары, персистирлейтін немесе созылмалы жөтел бар пациенттерге дәрігермен алдын-ала кеңесу ұсынылады.

Мұндай жағдайлардың даму қаупінің жоғарылағанын ескеру керек

Тахикардия. Фенилэфрин жүрек қағу жиілігінің жоғарылауына, бас айналуына немесе қатты жүрек соғуына әкелуі мүмкін, бұл туралы пациенттерге ескерту керек.

Гепатоуыттылық. Бауырдың алкогольді зақымдануы бар науқастарда парацетамолдың гепатоуытты әсер ету қаупі артады. Артық дозалану қаупі бауырдың алкогольдік ауруларында жоғарылайды. Емдеу кезінде хлорфенирамин малеатының седативті әсерін және парацетамолдың гепатоуыттылығын күшейтетін алкоголь тұтынудан аулақ болу керек.

Кофеиннің ОЖЖ стимуляциялаушы әсері. Препаратты қолданған кезде кофені, ащы шайды, басқа сергіткіш сусындар мен кофеині бар дәрілік заттарды шамадан тыс тұтынудан аулақ болу керек. Бұл ұйқының, тремордың, кернеудің, тітіркенудің, жүрек қағуының проблемаларын тудыруы мүмкін. Құрысу ұстамаларының пайда болу қаупі бар пациенттерге және эпилепсиясы бар пациенттерге сақтықпен қолдану керек.

Несеп шығарудың бұзылуы. Қуық асты безінің аденомасы, феохромоцитома, несеп шығарудың бұзылуы болған кезде препаратты дәрігер қауіп / пайда арақатынасын бағалағаннан кейін ғана тағайындай алады.

Метаболизмдік ацидоз. Парацетамолды қабылдау кезінде глутатион деңгейінің төмендеуімен қатар жүретін сепсис сияқты ауыр инфекциялары бар пациенттерде метаболизмдік ацидоздың пайда болу қаупі артады. Метаболизмдік ацидоздың симптомдары терең, тез немесе тыныс алудың қиындауы, жүрек айнуы, құсу, тәбеттің жоғалуы. Бұл симптомдар пайда болған жағдайда дереу дәрігермен кеңесу керек.

Қан айналымының бұзылуы

Компенсацияланған жүрек жеткіліксіздігі кезінде, туа біткен QT аралығы ұзарған пациенттерге немесе QT аралығын ұзартуы мүмкін препараттарды ұзақ қабылдау жағдайларында сақтықпен қолдану керек.

Препаратты қолданар алдында, егер пациент варфаринді немесе антикоагулянттық әсері бар ұқсас препараттарды қолданса, дәрігермен кеңесу керек.

Артериялық гипертензия, жүрек ырғағының бұзылуы болған кезде препаратты дәрігер қауіп / пайда арақатынасын бағалағаннан кейін ғана тағайындай алады.

Бауыр жеткіліксіздігі

Препаратты қолданар алдында дәрігермен кеңесу керек, өйткені бұл дәрілік зат бауырдың ауыр жеткіліксіздігі бар пациенттерге қарсы көрсетілген.

Бүйрек жеткіліксіздігі

Препаратты қолданар алдында дәрігермен кеңесу керек, өйткені бұл препаратты ауыр бүйрек жеткіліксіздігі бар пациенттерге сақтықпен қабылдау керек.

Қант диабеті

Препарат қандағы глюкоза құрамын зертханалық зерттеу нәтижелеріне әсер етуі мүмкін.

Басқа жағдайлар

Препаратты қолдану допинг-бақылаудың оң талдамалық нәтижесін тудыруы мүмкін.

Кездейсоқ артық дозалану жағдайында науқас, егер денсаулығы нашарламаса да, дереу дәрігермен кеңесу керек.

Егер дәрігердің ұсынысы бойынша препарат ұзақ уақыт бойы қолданылса, бауырдың функционалды жағдайын және шеткері қанның көрінісін бақылау қажет.

Препарат қандағы глюкоза мен несеп қышқылының мөлшері бойынша зертханалық зерттеулердің нәтижелеріне әсер етуі мүмкін.

Басқа дәрілік препараттармен өзара әрекеттесуі

Осы дәрілік зат үшін өзара әрекеттесуге арнайы зерттеулер жүргізілген жоқ. Төменде ұсынылған ақпарат дәрілік заттың жекелеген компоненттері үшін маңызды болып табылады.

Парацетамолдың сіңу жылдамдығын метоклопрамид пен домперидон жоғарылатады, ал холестирамин төмендетеді. Парацетамолмен бір мезгілде қолданғанда өзара әрекеттесудің мынадай түрлері байқалуы мүмкін: антибиотиктердің организмнен шығарылуы баяулауы мүмкін; тетрациклин парацетамол тудырған анемия мен метгемоглобинемияның даму қаупін арттырады; антацидтер мен тамақ парацетамолдың абсорбциясын азайтады. Бір мезгілде ұзақ қолданған кезде кумариндердің антикоагулянттық әсері күшейеді (мысалы, варфарин). Барбитураттар парацетамолдың ыстық түсіретін белсенділігін төмендетеді. Бауырдың микросомальді ферменттерін стимулдайтын құрысуға қарсы препараттар (фенитоин, барбитураттар, карбамазепин) және изониазид парацетамолдың гепатоуыттылығын күшейтуі мүмкін. Парацетамолды гепатоуытты дәрілермен бір мезгілде қолданғанда препараттардың бауырға уытты әсері артады. Парацетамол диуретиктердің тиімділігін төмендетеді.

Фенилэфрин гидрохлориді индометацин және бромокриптинмен қолданғанда ауыр артериялық гипертензияны туындатуы мүмкін; симпатомиметикалық аминдермен, дигоксинмен және жүрек гликозидтерімен аритмия және миокард инфарктісі қаупін арттырады.

ß-блокаторлардың және артериялық гипертензия және жанама жүрек-қантамыр реакциялары қаупінің жоғарылауымен гипертензияға қарсы басқа да препараттардың (резерпин, метилдопа) тиімділігін төмендетуі мүмкін.

Раувольфия алкалоидтары фенилэфрин гидрохлоридінің емдік әсерін азайтады

α-адреноблокаторлар (фентоламин), фенотиазиндер, фуросемид және басқа диуретиктер вазоконстрикцияға кедергі жасайды.

Фенилэфрин басқа симпатомиметиктермен бірге жағымсыз жүрек-қантамыр реакцияларының қаупін арттырады.

Фенилэфрин гидрохлоридінің МАО тежегіштерімен өзара әрекеттесуі гипертензиялық әсерді тудырады, трициклдік антидепрессанттармен (амитриптилин) - кардиоваскулярлық жағымсыз әсерлер қаупін арттырады.

Хлорфенамин атропиннің, спазмолитиктердің, ОЖЖ бәсеңдететін дәрілердің (транквилизаторлар, барбитураттар), паркинсонизмге қарсы препараттардың антихолинергиялық әсерін күшейтеді.

Алкогольмен бір мезгілде қолдануға болмайды. Хлорфенамин алкогольмен бір мезгілде қолданғанда бір-бірінің әсерін күшейтеді.

Ұйықтататын таблеткалармен, барбитураттармен, тыныштандыратын дәрілермен, нейролептиктермен, транквилизаторлармен, анестетиктермен, есірткі анальгетиктерімен, алкогольмен бір мезгілде қолдану хлорфенирамин малеатының әсерін күшейтеді.

Мапротилин (төрт циклді антидепрессант) және антихолинергиялық әсері бар басқа препараттар осы препараттардың немесе хлорфенирамин сияқты антигистаминдердің антихолинергиялық әсерін күшейтуі мүмкін.

Кофеин бір мезгілде қолданған кезде анальгетиктер-антипиретиктер (биожетімділікті жақсартады), ксантин туындылары, a- және β-адреномиметиктер, психостимуляторлар, тиреотропты дәрілер, эрготамин (АІЖ эрготаминнің сіңуі жақсарады) әсерін күшейтеді.

Циметидин, гормондық контрацептивтер, изониазид кофеиннің әсерін күшейтеді.

Кофеин бауырдың гепатоуытты препараттармен зақымдану ықтималдығын ұлғайтады.

Кофеин апиындық анальгетиктердің, анксиолитиктердің, ұйықтататын және седативті дәрілердің әсерін төмендетеді, наркозға арналған дәрілердің және ОЖЖ басатын басқа препараттардың антагонисті, аденозиннің, аденозинтрифосфаттың (АТФ) бәсекелес антагонисті болып табылады, қандағы литий концентрациясын төмендетеді.

Отоуытты және фотосенсибилизациялаушы препараттар бір мезгілде қолданғанда жағымсыз әсерлерді күшейтуі мүмкін.

Арнайы ескертулер

Педиатрияда қолдану

12 жасқа дейінгі балаларға қолдануға болмайды.

Жүктілік немесе лактация кезінде

Жүктілік

Туу кезінде дене салмағының төмендеуі және кофеинді тұтынумен байланысты өздігінен болатын түсік қаупі жоғары болуына байланысты препаратты жүктілік кезінде қолдану ұсынылмайды.

Лактация кезеңі

Бұл препаратты лактация кезінде қолдануға болмайды, өйткені оның әсер етуші заттары емшек сүтімен шығарылуы мүмкін.

Препараттың көлік құралын немесе қауіптілігі зор механизмдерді басқару қабілетіне әсер ету ерекшеліктері

РИКОФАСТ АНТИГРИППИН таблеткалары ұйқышылдықты, бас айналуды, бұлыңғыр көруді және психомоторлық бұзылуларды тудыруы мүмкін, бұл пациенттердің көлік пен техниканы басқару қабілетін айтарлықтай шектеуі мүмкін.

Препаратты қабылдау кезінде автокөлікті және қозғалыстағы потенциалды және қауіпті механизмдерді басқаруға болмайды.

Қолдану жөніндегі нұсқаулар

Дозалау режимі

1 таблеткадан тәулігіне 2-3 рет, бірақ 4-6 сағаттан соң ғана.

Ең жоғары бір реттік доза: 1 таблетка.

Ең жоғары тәуліктік доза: 3 таблетка.

Ескерту: көрсетілген дозадан немесе дозалау жиілігінен асырмаңыз.

Пациенттердің ерекше топтары

Балалар

Дәрілік затты 12 жастан асқан балаларға 1 таблеткадан тәулігіне 2-3 рет, бірақ 4-6 сағаттан соң ғана тағайындауға болады.

Бауыр жеткіліксіздігі бар пациенттер

Бұл дәрілік затты бауырдың ауыр жеткіліксіздігі бар пациенттерге қолдануға болмайды.

Бүйрек жеткіліксіздігі бар пациенттер

Бұл дәрілік затты дозаны түзетусіз бүйрек жеткіліксіздігі бар пациенттерде сақтықпен қолдануға болады.

Енгізу жолы және тәсілі

Препарат тамақ ішкеннен кейін кем дегенде жарты сағаттан соң пероральді қабылданады.

Қабылдау уақыты көрсетілген қолдану жиілігі

Қабылдаулар арасындағы аралық 4-6 сағаттан кем емес.

Емдеу ұзақтығы

Дәрігердің кеңесінсіз емдеу ұзақтығы 3 күннен аспайды.

Артық дозалану жағдайында қабылдануы қажет шаралар

Симптомдары

Парацетамолмен артық дозаланғанда алғашқы 24 сағат ішінде келесі симптомдар дамиды: бозару, жүрек айнуы, құсу, анорексия және іштің ауыруы. Бауыр трансаминазаларының белсенділігі артады, билирубин концентрациясы жоғарылайды және протромбин деңгейі төмендейді. Артық дозаланған жағдайда терлеудің жоғарылауы, психомоторлы қозу немесе орталық жүйке жүйесінің бәсеңдеуі, бас айналуы, ұйқының бұзылуы, ұйқышылдық, жүрек ырғағының бұзылуы, тахикардия, экстрасистолия, тремор, гиперрефлексия, құрысу, панкреатит байқалуы мүмкін. Сирек жағдайларда өзекшелердің өткір некрозымен жүретін жедел бүйрек жеткіліксіздігі туралы хабарланды, бел аймағының ауыруы, гематурия, протеинурия, нефроуыттылықпен көрініс табады (бүйрек коликасы, интерстициальді нефрит, папиллярлық некроз).

Ересектерге 10 г немесе одан да көп парацетамол және балаға 150 мг/кг артық парацетамол қолдану сананың бұзылуымен энцефалопатия, бауыр комасы және өлім дамитын гепатоцеллюлярлық некрозға әкелуі мүмкін.

Бауырдың зақымдануының алғашқы клиникалық және биохимиялық белгілері артық дозаланғаннан кейін 12-48 сағаттан соң пайда болуы мүмкін. Глюкоза алмасуының бұзылуы және метаболизмдік ацидоз пайда болуы мүмкін. Жоғары дозаларда ұзақ қолданғанда аплазиялық анемия, панцитопения, агранулоцитоз, нейтропения, лейкопения, тромбоцитопения болуы ықтимал.

Қауіп факторлары (карбамазепинмен, фенобарбиталмен, фенитоинмен, примидонмен, рифампицинмен, гиперикуммен немесе бауыр ферменттерін қоздыратын басқа дәрілік заттармен ұзақ емдеу) бар пациенттерде алкоголизм, глутатионды кахексия (ас қорыту бұзылыстары, муковисцидоз, АИТВ-инфекция, ашығу, кахексия)) 5 г немесе одан да көп парацетамолды қолдану бауырдың зақымдалуына әкелуі мүмкін.

Фенилэфрин мен хлорфенирамин малеатының әсерінен артық дозалану симптомдары: бас ауыруы, гипергидроз, ұйқышылдық, сананың бұзылуы, ұйқысыздық, мінез-құлықтың өзгеруі, психомоторлық қозу немесе орталық жүйке жүйесінің (ОЖЖ) бәсеңдеуі, мазасыздық, ашушаңдық, тремор, құрысу, гиперрефлексия, бас айналуы, жүрек айнуы, құсу, артериялық гипертензия, тахикардия, аритмия, экстрасистолия.

Хлорфенирамин малеаты артық дозалануында жағдай бәсең күйден қозу күйіне дейін ауытқуы мүмкін (мазасыздық және құрысу). Мидриаз, фотофобия, терінің және шырышты қабықтардың құрғауы, дене температурасының жоғарылауы, ішек атониясы, орталық жүйке жүйесінің бәсеңдеуі тыныс алудың бұзылуымен және жүрек-қантамыр жүйесінің бұзылуымен қатар жүреді (ырғақ жиілігінің төмендеуі, артериялық қысымның қан тамырлары жеткіліксіздігіне дейін төмендеуі).

Кофеиннің артық дозалануымен келесі симптомдар байқалады: дегидратация, гипертермия, құлақ шулауы, эпигастрий аймағындағы ауырсыну, диурез жиілігінің жоғарылауы, экстрасистолия, тахикардия, тыныс алудың жиілеуі, аритмия, орталық жүйке жүйесіне әсер ету (бас айналуы, ұйқысыздық, қозу, ашушаңдық, психомоторлық қозу, аффект жағдайы, үрей, тремор, құсу, конвульсия, ажитация, мазасыздық, делирий, жоғары тактильді немесе ауыру сезімталдығы).

Біріктірілген препараттармен (парацетамол, хлорфенирамин, фенилэфрин, кофеин) ауыр улану кезінде бауыр функциясының бұзылуы сананың бұзылуымен энцефалопатияға, қан құйылуға, гипогликемияға, ми ісінуіне дейін қршуі, жекелеген жағдайларда өлімге әкелуі мүмкін. Өзекшелердің жедел некрозы бар бүйрек функциясының жедел бұзылуы белдің қатты ауыруымен, гематуриямен, протеинуриямен көрінеді және бауырдың ауыр зақымдануы болмаса да дамиды. Жүрек аритмиясы және панкреатит анықталды.

Емі

Егер артық дозалануға күдік болса, пациентті ауруханаға жеткізу керек. Симптомдар жүрек айнуымен және құсумен шектелуі мүмкін немесе артық дозаланудың ауырлығын немесе ағзаның зақымдану қаупін көрсетпеуі мүмкін. Егер парацетамолдың шамадан тыс дозасы 1 сағат шегінде қабылданса, белсендірілген көмірмен емдеуді қарастырған жөн. Күдікті артық дозаланғаннан кейінгі алғашқы 6 сағат ішінде шаю қажет. Ауыр гипертензия кезінде α-, β-адреноблокаторларды қолданған жөн. Қан плазмасындағы парацетамолдың концентрациясы қабылдағаннан кейін 4 сағаттан соң немесе кейінірек өлшенуі керек (анағұрлым ерте концентрациялар сенімсіз). Қабылдағаннан кейін 24 сағат ішінде ацетилцистеин (парацетамолмен уланған кезде антидот) енгізуді қолданады, қолданудан болатын ең жоғары әсерді қабылдағаннан кейін алғашқы 8 сағат ішінде алады. Артық дозаланғаннан кейінгі алғашқы 8 сағат ішінде құсу болмаған кезде метионин ауруханадан тыс шалғай аудандарда тиісті альтернатива ретінде пероральді қолданылуы мүмкін. Осы уақыттан кейін антидоттардың тиімділігі күрт төмендейді. Қажет болса, пациентке ацетилцистеинді қолданыстағы нұсқауларға сәйкес вена ішіне енгізуге болады.

Дәрілік препаратты қолдану тәсілін түсіндіру үшін медицина қызметкерінің кеңесіне жүгіну бойынша нұсқаулар

Сұрақ туындаған жағдайда дәрілік препаратты қабылдау алдында кеңес алу үшін дәрігерге қаралыңыз.

ДП стандартты қолдану кезінде көрініс табатын жағымсыз реакциялардың сипаттамасы және осы жағдайда қабылдануы керек шаралар

Белгісіз

– тәбеттің төмендеуі, жүрек айнуы, құсу, ауыздың құрғауы, гиперсаливация, қыжыл, эпигастрийдегі жайсыздық және ауыруы, ойық жараның өршуі, метеоризм, диарея, іш қату

– анафилаксияны, анафилаксиялық шокты, ангионевроздық ісінуді қоса, аса жоғары сезімталдық реакциялары

– тері бөртпесі, шырышты қабықтардағы бөртпе (әдетте жайылған бөртпе, эритематозды), қышыну, есекжем, мультиформалы экссудативті эритема, Стивенс-Джонсон синдромы, уытты эпидермальді некролиз (Лайелл синдромы)

– психомоторлық қозу және ориентацияның бұзылуы, алаңдаушылық, мінез-құлық бұзылуы, қорқыныш сезімі, үрей, ашушаңдық, ұйқының бұзылуы, ұйқысыздық, ұйқышылдық, бас айналуы, сананың шатасуы, елестеу, депрессиялық жағдай, тремор, жүйкелік қозу, шаншу сезімі және қол-аяқтағы ауырлық, құлақтың шулауы, бас ауруы, жекелеген жағдайларда - кома, құрысу, дискинезия

– аспиринге және басқа да ҚҚСП-ға сезімтал пациенттерде бронх түйілуі

– көрудің және аккомодацияның бұзылуы, мидриаз, көзішілік қысымның жоғарылауы, көздің құрғауы

– тәбеттің төмендеуі, жүрек айнуы, құсу, ауыздың құрғауы, гиперсаливация, қыжыл, эпигастрийдегі жайсыздық және ауыруы, ойық жараның өршуі, метеоризм, диарея, іш қату

– бауыр функциясының бұзылуы, бауыр ферменттері белсенділігінің жоғарылауы, әдетте, сарғаюдың дамуынсыз, гепатонекроз (жоғары дозаларды қолданғанда), гепатоуыттылық

– гипогликемия, гипогликемиялық комаға дейін

– анемия, оның ішінде гемолитикалық анемия, көгеру немесе қан кету, сульфгемоглобинемия және метгемоглобинемия (цианоз, ентігу, жүрек ауруы). Жоғары дозаларда ұзақ қолданғанда - аплазиялық анемия, панцитопения, агранулоцитоз, нейтропения, лейкопения, тромбоцитопения

– жоғары дозаларды қолданғанда - нефроуыттылық (папиллярлық некрозды қоса), несеп шығарудың бұзылуы, несептің іркілуі және несеп шығарудың қиындауы, дизурия, интерстициальді нефрит, креатинин клиренсінің жоғарылауы, натрий мен кальций экскрециясының жоғарылауы, асептикалық пиурия, бүйрек коликасы

– артериялық гипертензия, тахикардия немесе рефлекторлық брадикардия, аритмия, ентігу, жүректің ауыруы

– жалпы әлсіздік, терлеудің жоғарылауы, гипогликемиялық комаға дейін дамуы мүмкін гипогликемия, мұрынның бітелуі, қандағы несеп қышқылының ықтимал жалған жоғарылауы, бұл Bittner әдісімен анықталады; несептегі 5-гидроксииндолсірке қышқылының, ванилилминдальді қышқылдың және катехоламиндердің шамалы жоғарылауы

Жағымсыз дәрілік реакциялар туындаса медицина қызметкеріне, фармацевтика қызметкеріне немесе дәрілік препараттардың тиімсіздігі туралы хабарламаларды қоса, дәрілік препараттарға жағымсыз реакциялар (әсерлер) бойынша ақпараттық деректер базасына тікелей хабарласыңыз

Қазақстан Республикасы Денсаулық сақтау министрлігі Медициналық және фармацевтикалық бақылау комитеті «Дәрілік заттар мен медициналық бұйымдарды сараптау ұлттық орталығы» ШЖҚ РМК

http://www.ndda.kz

Қосымша мәліметтер

Дәрілік препараттың құрамы

Бір таблетканың құрамында

белсенді заттар: 500 мг парацетамол, 30 мг кофеин (сусыз), 10 мг фенилэфрин гидрохлориді, 2 мг хлорфенирамин малеаты;

қосымша заттар: микрокристалды целлюлоза, жүгері крахмалы (паста үшін), повидон (К-30), тазартылған су, натрий крахмалы гликоляты (А түрі), тазартылған тальк, магний стеараты, калий полакриллині (Кирон Т134), кросповидон (XL-10).

Сыртқы түрінің, иісінің, дәмінің сипаттамасы

Бір жағында ойығы бар, дөңгелек пішінді, жайпақ, ақ түстен ақ дерлік түске дейінгі таблеткалар.

Шығарылу түрі және қаптамасы

10 таблеткадан алюминий фольгадан жасалған пішінді ұяшықсыз қаптамаға салынады. 1 немесе 10 пішінді қаптамадан медициналық қолдану жөніндегі қазақ және орыс тілдеріндегі нұсқаулықпен бірге картон қорапшаға салынады. 4 таблеткадан алюминий фольгадан жасалған пішінді ұяшықсыз қаптамаға салынады. 1 пішінді қаптамадан қағаз конвертте. 25 конверттен медициналық қолдану жөніндегі қазақ және орыс тілдеріндегі нұсқаулықпен бірге картон қорапшаға салынады.

Сақтау мерзімі

3 жыл

Жарамдылық мерзімі өткеннен кейін қолдануға болмайды.

Сақтау шарттары

Құрғақ, жарықтан қорғалған жерде, 25°С-ден аспайтын температурада сақтау керек.

Балалардың қолы жетпейтін жерде сақтау керек!

Дәріханалардан босатылу шарттары

Рецептісіз

Өндіруші туралы мәлімет

Brawn Laboratories Limited

13, N.I.T., Industrial Area, Haryana, Фаридабад-121001, Үндістан

тел./факс: +91-129-4360113, +91-11-23275208 электронды пошта: regulatory2@brawnlabs.com

Тіркеу куәлігінің ұстаушысы

VISTA LABS DMCC

Unit No. 3O-01-3048, Plot No. DMCC-PH2-J&G Plexs, Дубай, Біріккен Араб Әмірліктері

тел. + 971 56657797

электронды пошта: vistalabs@hotmail.com

Қазақстан Республикасы аумағында тұтынушылардан дәрілік заттың сапасына қатысты шағымдарды (ұсыныстарды) қабылдайтын және дәрілік заттың тіркеуден кейінгі қауіпсіздігін қадағалауға жауапты ұйымның атауы, мекенжайы және байланыс деректері (телефон, факс, электронды пошта)

«Метабол Казахстан» ЖШС, Қарағанды қ., Ермеков к-сі 110/2

тел.+7(212) 43-38-11, факс +7(212) 43-38-15

электронды пошта : metabolcompany@mail.ru