Хлорофиллипт ерітінді 100 мл - бағасы Астанада

Дәрілік затты медициналық қолдану

жөніндегі нұсқаулық

ХЛОРОФИЛЛИПТ

Саудалық атауы

Хлорофиллипт

Халықаралық патенттелмеген атауы

Жоқ

Дәрілік түрі

Спирт ерітіндісі 10 мг/мл, 100 мл

Құрамы

1 мл ерітіндінің құрамында:

белсенді зат – хлорофиллипт қою экстрактісі (extractum chlorophyllipti spissum), құрғақ заттың 100% мөлшеріне шаққанда (1:15,3) – 10 мг;

қосымша зат: этанол 96 %.

Сипаттамасы

Күңгірт-жасыл түсті сұйықтық. Сақтау үдерісінде шөгінді түзілуіне жол беріледі.

Фармакотерапиялық тобы

Дерматология. Антисептиктер және дезинфекциялайтын препараттар. Антисептиктер және басқа да дезинфекциялайтын препараттар.

АТХ коды D08AX

Фармакологиялық қасиеттері

Фармакокинетикасы

Фармакокинетикасы мен биожетімділігі жөніндегі деректер жоқ.

Фармакодинамикасы

Препараттың құрамында эвкалипт жапырақтарында болатын хлорофилдер қоспасы бар. Бактерияға қарсы және қабынуға қарсы белсенділікке ие, иммун жүйесін көтермелейді, гипоксияға қарсы әсер етеді. Жергілікті қолданған кезде зақымданған тіндердің қайта қалпына келуіне ықпал етеді, детоксикациялық қасиетін байқатады.

Қолданылуы

Антибиотикке төзімді стафилококктардан туындаған ауруларда кешенді ем құрамында:

- күйіктер, трофикалық ойық жаралар

- жатыр мойнының эрозиясы

- асқазан-ішек жолының инфекциялық аурулары

Қолдану тәсілі және дозалары

Препараты ішке, ректальді және жергілікті тағайындайды.

Күйіктер және трофикалық ойық жаралары

1% спирт ерітіндісін 0,25% новокаин ерітіндісімен 1:5 пропорцияда сұйылтады және ерітіндіге малынған дәке таңғыштар түрінде пайдаланады. Емдеу курсы – 2-3 апта.

Жатыр мойнының эрозиясын емдеу

Шырышты қабықтың барлық қатпарларын және жатыр мойнының қынаптық бөлігін тампонмен алдын ала құрғатады және жатыр мойнының өзегіне және эрозияға 1% спирт ерітіндісін жағады. Немесе алдын ала қайнатылған 1 мл жылы суда 15 мл 1% спирт ерітіндісін сұйылтып алынған ерітіндімен қынапты бүркіп шаяды. Емдеу курсы – 2 апта. Эпителизация толық болмаған кезде емдеу курсын қайталауға болады.

Асқазан-ішек жолының инфекциялық ауруларын емдеу

Ішектегі стафилококк тасымалдаушылығы кезінде ересектерге ішке тағайындайды: алдын ала қайнатылған 30 мл жылы суда сұйылтылған 5 мл 1% спирт ерітіндісі препаратын 25 тамшыдан күніне 3 рет тамақтанудан 40 минут бұрын күнделікті қолданады. Емдеу курсы 7-10 күн.

Ішектегі стафилококк тасымалдаушылығы кезінде ересектерге ректальді клизма түрінде қолданады: 20 мл 1 % спирт ерітіндісін алдын ала қайнатылған 1 л жылы суда сұйылтады (1 клизмаға арналған дозасы). Хлорофиллиптпен клизманы әрбір 2 күн сайын қояды. Емдеу курсы 10 емшарадан тұрады.

Жағымсыз әсерлері

Иммундық жүйе тарапынан: препаратты қолданғанда шырышты қабықтардың ісінуін, гиперемияны, қышынуды, бөртпені қоса, аллергиялық реакциялар болуы мүмкін.

Жүйке жүйесі тарапынан: бас айналуы, бас ауыруы.

Қолдануға болмайтын жағдайлар

- препаратты жекелей көтере алмаушылық

- 18 жасқа дейінгі балаларға

- алкоголизм, эпилепсиямен зардап шегетін адамдар үшін

- бауыр аурулары бар пациенттер

- жүктілік және бала емізу кезеңі

Дәрілермен өзара әрекеттесуі

Антисептикалық препараттар мен антибиотиктердің әсерін потенциялайды. Препарат құрамында 96% этил спирті бар, сондықтан бір мезгілде қолданған кезде психотропты, миорелаксациялаушы дәрілердің және алкогольдің әсері күшеюі мүмкін. Жарада сутегінің асқын тотығының қалдығы қалған кезде хлорофиллипт тұнбаға түседі, сондықтан жараны сутегінің асқын тотығымен жуғаннан кейін оның қалдығын натрий хлоридінің стерильді изотониялық ерітіндісімен кетіру қажет.

Айрықша нұсқаулар

Емдеуді бастар алдында таңдалған қолдану тәсіліне қарамастан, хлорофиллиптке сезімталдықты анықтайды, ол үшін науқас 1 ас қасық суға сұйылтылған препараттың 25 тамшысын ішеді. 6-8 сағаттан соң аллергия белгілері (еріннің, аңқа шырышының ісінуі және т.б.) болмаса, препаратты қолдануға болады.

Препарат құрамында 96% этил спирті бар, сондықтан оны пациенттерге оларда алкоголь немесе есірткіге тәуелділік дамуына бейімділік болған кезде, сондай-ақ бауыр функциясының айқын бұзылуы, эпилепсия, қант диабеті бар пациенттерге тағайындамау керек.

Дәрілік препараттың көлік құралдарын немесе қауіптілігі зор механизмдерді басқару қабілетіне әсер ету ерекшеліктері

Препарат құрамында этил спирті болғандықтан, емдеу кезінде жоғары зейін қоюды қажет ететін қауіптілігі зор жұмыс түрлерінен бас тарту керек.

Артық дозалануы

Симптомдары: жағымсыз реакцияларының көріністері күшеюі мүмкін.

Емі – симптоматикалық.

Шығарылу түрі және қаптамасы

100 мл препараттан полиэтилен тығынмен тығындалған және бұралатын қақпағы, немесе алюминий қалпақшасы, немесе бірінші ашылуы бақыланатын қақпақтары, немесе бірінші ашылуы бақыланатын және балалардан қорғалған қақпақтары бар шыны құтыда немесе шыны банкіде, немесе полимер қақпағы бар полимер құтыда. Құтыларға немесе банкілерге заттаңба жабыстырылады.

1 құты немесе банкі қолдану жөніндегі мемлекеттік және орыс тілдеріндегі нұсқаулықпен бірге, картоннан жасалған қорапшаға салынады.

Сақтау шарттары

Түпнұсқалық қаптамасында, 25 ⁰С-ден аспайтын температурада сақтау керек. Балалардың қолы жетпейтін жерде сақтау керек.

Сақтау мерзімі

2 жыл

Жарамдылық мерзімі өткеннен кейін қолдануға болмайды.

Дәріханалардан босатылу шарттары

Рецепт арқылы

Өндіруші

«Галичфарм» ЖАҚ Украина, 79024, Львов қ., Опрышковская к-сі, 6/8

Тіркеу куәлігі иесінің атауы мен елі

«Галичфарм» ЖАҚ, Украина

Қазақстан Республикасы аумағында тұтынушылардан дәрілік заттың сапасына қатысты шағымдарды (ұсыныстар) қабылдайтын және дәрілік заттың тіркеуден кейінгі қауіпсіздігін қадағалауға жауапты ұйымның атауы, мекенжайы және байланыс деректері (телефон, факс, электрондық пошта):

«Фармамед сауда үйі» ЖШС, Алматы қ., Ходжанов көшесі, 67 ғимарат, т.е. 4а

Тел.: +7 (727) 344-99-05/06

Е-mail: Almaty@pharmamed-arterium.kz